Int. Rosentaler Meisterschaft 2008

Howdie,

wie im letzten Post ongekündigt, und nach mehrmaliger Nachfrage (ganze 1 mal) schreib i a poar Zeilen zu de Clubmastaschoftn der Drachenflieger Klagenfurt. Fias Hintergrundwissen, do bin i Kassier.

Am 5. Juli wors wieder soweit. Wie jedes Johr, am ersten Juliwochenende die Clubmastaschoftn am schönen Singerberg. Rompnstart und des gonze astrein noch Norden ausgrichtet. Den Termin konn i nur jeden ons Herz legen, wal bis dato homma an dem Weekend meistens Nord ghobt.

Wie imma wor a rege Teilnahme festzustellen. Von die Wolfsberger hot sich kana auffa getraut bis aufn Gordon mit sein neien, longan Aeros Combat u. dem Leime. San oba a beide Klogenfurter Drochenreiter. Weiters aus Vienna (heit was amol Klagenfurt calling) da Bokalic Alex. Der Rest wor ortsansässig.

Am Onfong hom die Cracks sich geziert u. san erst um a holba 11e vollzählig eingetroffn. 18 Competitors an der Zahl. Net schlecht Herr Specht. Noch an kurzen Briefing, danke dem Schriftführer (Albrecht) u. dem Präsi (Viktor) fia die Erklärung der Aufgob (1h fliagn u. Punktlondn), gings donn mitn Hafner Lostna u. dem Vereinsbus auffe.

Obn am Start, siehe da, wieder leichter Nord... oba da Tog hot gor nit amol so guat ausgschaut. Egal, bau ma amol auf die Maukn. Obe buckn zu die Segellottn is nit so guat gongan, gestern obnd wohl aniga Schnapslan schlecht gwesen. Den Mothe hot ma seine Biere vom Vorobnd nit ongmerkt. Der Bursche is trainiert, is sogs eich ;-)

Zerst noch a Gruppenfoto, i glab ohne Alex der wor schon einghängt, donn wor des Gate, oda wie ma in Kärnten sogn tat "die Gota" (englisch u. Kärntner-Dialekt hot aniges gemeinsam follt ma grod auf), offn.

Da Präsi wieder amol lauthals: "Stellts eire Drochen auf die Seiten, dass die Leit ausse kennan!!!" Trogt sei Atos Gurkn vua die Rompn u. startet, no wos glabts, i vermut als letzter.... ;-) Da Brecher Otto is glei amol mit ohne Beinschliessen ausse... wahrscheinlich die Aufregung wegen dem internationalen Bewerb :-)

Guat, wie es ausgschaut hot geht heite echt nixi. Aber man soll den Tag nit vurn Obnd loben... links is doch wos gongan u. so hot ma holt umma gekrotz am Singerhigl. I auffe auf 1700m donn wor nix mehr... donn unta a Wolkn eine, zum AEROS-Gordon, wieder nix gongan. Auf 1200m donn a horizontaler Bort u. mit dem donn auffe auf 1900m. Da Präsi wollt a eina, oba do hot er heite Pech ghobt.... i wor im Angriffsmodus unterwegs ;-)). Unta uns da Alex a noch in den Bart des Propheten eine u. is a noch auffe. Vom Ferlacher Horn is da Kittner Horsti mit sein VQ noch zu uns gstossn.

Auf 2200m homma uns donn getrennt. Da Gordon is zum Wörthersee, Alex waas i nit, Horsti in die Karawankn und i zum Ferlacher Horn. Mit 1850m onkumman, hob i donn nit long Thermik gsuacht und bin wieder zruck zum Singerling. Die Stund wor voll u. a 2007er Wiederholung (short landing) wor nit mei Ziel. Vielmehr a guate Punktinger. Da Gordn hot a bissl ge-wing-overt und is im Kreis oba nit am Punkt glondet, da Viktor is mit da Frieda zgleich eine, da Alex über des Ziel hinaus geschossen u. der Atos Recke Horsti wor noch in da Luft.

Beim Onflug hob i ma gedocht, mochst holt a bissl a Linkslondevoltn donn werd schon passn. Und so wors. Endonflug im Werner Galaun-Stil (8ern bis da Fliegl straft) u. donn nur noch ausgleitn. Gstondn bin i 2m vor dem Punkt. Die netten Damen von der Vermessung meinten, dass des am nächsten war. Oba da Horsti wor noch in da Luft. Also schnell a Bier in di Venan gschossn, mit die ondaran gratscht, Kote eingwurfn u. obgwortet. Da Horsti hot donn die Gleitleistung des ATOS VQ a bissl überschetzt und wor zweit weg. Nojo, hot sich da Kassier gedocht, hät ma des a erledigt :-))))

Ranking schaut so aus:

1. Kassier
2. Aeros Gordon
3. Präsi
4. Atos Horsti
.
.
.
.
.
17. UP-Speed Leime
18. Brecher Otto

thomas fraissl
Bei der Preisverleihung (wie da Willswing Wolfi sogn tat), sprich Siegerehrung, hot da Präsi ollas geben.


Da Leime hot a wos gwunnan, die Schraubn. De kriagt da Letzt-Platzierte. Wal da Brecher Otto schon weg wor, hot miassn da Mothe herholtn. No jo wos solls, wenigstns wos fias Nochtkastl.



Alles in allem ein absolutes "must" fia die Drachenflieger Komune. Sowas gibts nit olle Tog zum Segn. Apropos segn, de Figurn u. Pokale de da Travar Franz mocht san allererste Sahne und die Aussicht über Kärnten a. Schon deswegen miassts kumman. Des olympische Feia ongezundn, da Dieter hot die Kote, Cici und Wirschtl obagegrillt, 2 Fassl offanes von unsere Nierndalan filtriert,gflogn a nit schleicht => Perfekter Tog konn i do nur sogn.


Vielleicht nächstes Jahr, wenns wieder um den gschwastn Riesengeier geht....



da Kassier

P.s.: Viktor, des Vario muasst schon lodn, sunstan mocht des kan mux, frogn Klaus..;-)