Schöckl No Limits - Staatsmeisterschaft im HG 2007

So, noch an Monat hob i meine Kräfte mobilisiert und werd a paar Zeilen zu meinem und auch Klaus Nössler's ersten Wettbewerb schreiben.

Am 28. April gings los, auf der A2 hob I mitn Klaus Kontakt aufgnomman, Treffpunkt wor die Raststation Kaiserwald. Da Klaus, noch nix gessn, samma Frühstücken gongan. Dass ma donn zspät san, hot der Fluglehrer gmant mocht nix. No jo... :-))

In St. Radegund onkumman san lauter Autos, mit Drochn drauf, umatumgfohrn. Mir zum Lambrecht (Bodenstation u. Clubhaus der Radegunder) u. schnöll des Nenngeld eingezahlt, a T-Shirt ausgsuacht u. die Waypoints aufespüln lossn. A bissl a Pflanzerei u. auf amol stellt sich der Task fia den heitign Tog aussa.
...217 km über 4 Wenden...
(LG hierbei an die 2 Lavanttaler Gleitschirmkampfpiloten)

No servas, die ersten drei Wenden warn schon a schena Flug gwesen, oba es san jo ongeblich die "Austrian Open" ;-)

Guat, auffe aufn Berg, a bissl a Stress is aufkommen, wie üblich -> zu spät
oba nix da, hot eh olles gepasst. Aufgebaut, Briefing u. das Gate wor eröffnet. Diesmal eine "Enter"-Variante mit folgenden Wegpunkten: Schöckl-Weiz-Aflenz-Trieben-Aflenz-Schöckl LP.



Beweisfoto



Start in die Welt der "Competition"


Da Klaus glei noch mir

Mir mitn Klaus relativ spät ausse, homms genau dawischt, 4 Minuten vor Startzeit samma in an Pulk von ca. 40 Drachen u. donn is schon losgongan. Die Spitze wor a glei amol weg u. donn hots ghassn rafn.

Den Klaus hob i den gonzn Flug nimma gsegen. Zwischen ersten u. zweiten Wegpunkt wor i donn a amol auf 1000 Meter, hobs oba noch dakrotzt.
In Aflenz is donn mit an 4 Meter Bort auffe auf dreizwa, donn is die Reise weitergongan Richtung Trieben.... In Tragöss bin i mit zwasiebn onkumman, hob von obn zwa Atos gsegen (Tim Grabowski u. Günter Legel) donn hots mi a obageblosen. Da Nord wor z'stork, auch für 50 andere Pilotn an dem Tog. Es hom lediglich zwa die Aufgabe gschofft. Da Klaus hots bis Aflenz gschofft, danoch oba den Flug a glei glöscht.... Start der Serie "Der Fluglehrer u. des Compeo" Teil 1.
Platzierung nach Tag 1: da Klaus nit gwertet u. I auf Platz 22


hmmm, wie werd i des schoffn mitn Compeo??? :-)))

TASK 2
Wieder Nord u. Startplatz die Nordrampn. Aufgabe heute: Schöckl - Punitz - Fehring - UL Flugplatz -> 113,5 km übers flache Burgenland....

Besuch homma a kriagt, da Wolf u. da Birni (liebe Grüße an dieser Stelle) hom gschaut, wos do so los is. Da Wolf hot a feste fotografiert, nochmals danke für den Link (Tip: mit an Klick auf die Überschrift seids dabei)

An dem Tog homma viel glernt - bei Rampenstart immer früh starten. De Worterei is ma gonz schen am Zaga gongan!! Egal.


Kurz vor Startzeit wor i auf zwadrei (Basis wor dreizwa) kumm i, in sozusagen: "Bad Air" mit minus 6 m/s is obegongan u. genau zum Startzeitpunkt war i auf Starthöhe!! I hob ma gedocht, so a Schaaaasss.... donn oba hob i an 6 Meter Bort ausgegroben u. wor in null komma nix auf Basis - Sudhöhe - und donn nix wie ob Richtung Burgenland, zu die "Gelbfüssler" (nähere Infos dazu bei Nössler Klaus).

Bei Kulm i´s ma durchn Kopf gongan, des mitn Flachland is gor nit so anfoch.... "What a big Glick", oba i hob noch amol Sudhöhe gmocht u. bin wieder aufn Track gwesen. Durch Graupelschauer u. voller Obschottung mit ca. 90 Km/h Air- u. 110 Km/h Groundspeed gen Osten. Moyes Litespeed S verpflichtet...

Über Gleis-, Loipersdorf u. anderen Ortschaften hot ma donn schen longsom den Ost gmerkt. Der wor ollerdings zw. 20 bis 30 Km/h stork. Irgendwonn merkt ma jo, da Teifl, jetzan werds eng, oba wenn ma donn a paar Atos u. Turmlose überholt, tuats an nit gonz so weh :-))))

All in all is mir guat gongan on den Tog. Bei die Flex hots kana ins Ziel gschofft. I bin vierter gwurden. Somit hob i on dem Tog fost olles vaputzt u. vablosn, wos Rong und Nomen hot (bitte nit ernst nehman *gg*). The "flying sheriff" Robert Reisinger hot gwunnan, lediglich 2 Km weiter als i. Juhuu des taugt miiiiii!!!
Da Klaus is on dem Tog 41ster gwurdn.

TASK 3
wor a kurze Aufgabe. Hot schon fost so ausgschaut, als ob der Tag gecancelt wird. Nachn Briefing gings weiter mit Teil 2 aus der Serie "Der Fluglehrer u. des Compeo". Da Klaus wor gestern noch so auf fliagn, dass er des Vario glei die gonze Nocht eingscholten glossn hot..... mit an Bregenzer hot er oba donn noch a bissl Soft einepumpn kennan.
Aufgrund der ziemlich tiafn Basis, nur achtzehnhundert, wors a bissl schwieriger. Da Klaus hot richtig taktiert u. is nit ins Obgschottete einegflogn. Mi hots noch 22 Kilometer obagsaugt, da Klaus is noch 32 km londn gongan.
On dem Tag san 14 Flex ins Ziel, bei die Starren hots kana zur ersten Wende gschofft..

Summary
Es wor echt Klass, des amol zu erleben. Do merkt ma amol, es gibt noch viel, viel zu lernen. Platzierungen sehen so aus:

1. Cataldi Elio (Moyes)
2. Weissenberger Tom (Moyes)
3. Reisinger Robert (Moyes)
.
.
.
16. Fraissl Thomas (Moyes)
.
.
.
.
43. Nössler Klaus (Moyes)


Alles nachzulesen auf der Seite Black Attack (siehe Link). Robert Reisinger hat auf seiner Homepage auch a paar Zeilen geschrieben.

Happy Landings

thome

P.s.: Vom 1. bis 3. Juni fohr i ausse zu de OÖ Meisterschaften aufn Feuerkogel. Wer will mitfahren??